D’Programmperiod 2021-2027 vum Asyl-, Migratiouns- an Integratiounsfong (AMIF) gouf opgesat duerch d'EU-Reegelung Nr. 2021/1147 vum Europäesche Parlament a vum Conseil vum 7. Juli 2021.
Dat allgemengt Zil vum Fong ass d'Bedeelegung un enger effikasser Gestioun vun de Migratiounsbeweegungen, souwéi un der Ëmsetzung, der Verstäerkung an der Entwécklung vun enger gemeinsamer Asylpolitik, de subsidiäre Schutz an den temporäre Schutz a vun enger gemeinsamer Immigratiounspolitik, am Respekt vun de Rechter a Grondsätz, déi an der Charta vun de Grondrechter vun der EU verankert sinn.
De Fong participéiert un der Realisatioun vun de folgende spezifeschen a gemeinsamen Ziler:
a) Verstäerkung an Entwécklung vun all den Aspekter vun engem gemeinsamen Asyl, inklusiv d'extern Dimensioun;
b) Ënnerstëtzung vun enger legaler Migratioun a Richtung vun de Memberstaaten, jee no den ekonomeschen a soziale Bedierfnisser, wéi d’Besoine vum Aarbechtsmaart, andeems d’Integritéit vun den Immigratiounssystemer vun de Staatsmemberen preservéiert gëtt, an effektiv Fërderung vun der Integratioun vun de Bierger aus Drëttlänner;
c) Fërderung an de Memberstaate vu fairen an effikasse Strategië fir de Retour, déi hëllefe géint illegal Awanderung ze kämpfen, andeems besonnesch Opmierksamkeet op d’Bestännegkeet vum Retour an op effikass Readmissioun an d'Hierkonfts- oder Transitland geriicht gëtt;
d) Méi Solidaritéit an eng besser Verdeelung vun de Responsabilitéiten tëscht de Memberstaaten, besonnesch vis-à-vis vun de Staaten, déi am meeschte vun de Migratiounsbeweegungen an Asylantë betraff sinn, inklusiv eng praktesch Kooperatioun.
Zu Lëtzebuerg ass de Generalsekretariat vum Aussen- an Europaministère (MAEE) déi responsabel Autoritéit fir d'Ëmsetzung vum Fonds 2021-2027. D‘Abteilung Integratioun vum Ministère fir Famill, Integratioun an d‘Groussregioun (MIFA) ass déi beoptraagt Autoritéit.
De Nationale Büro fir Opnam ("Office national de l’accueil", ONA) an d'Direktioun fir Immigratioun vum Aussen- an Europaministère sinn als Membere vum Comité de pilotage un der Ëmsetzung vum Fonds bedeelegt.
De Nationale Büro fir Opnam (ONA) ass zoustänneg fir d'Ëmsetzung vun Aktiounen zugonschte vu Persounen, déi internationale Schutz ugefrot hunn oder dëse Schutz genéissen, souwéi vu Persounen, déi vum temporäre Schutz profitéieren, wéi am Kader vum nationale Programm ënnert dem spezifeschen Zil 1 ("Gemeinsamen europäeschen Asylsystem") virgesinn.